Z Eschebach hani vom Zog us gseh wies am Bach näbe de Gleis entlang uf ere längi vo öpe hondert Meter alli Böim wäggschnette händ. Das hed mer grad so weh toh dasi z Hofdere usgschtege ben ond zo de Polizei gange ben. Die händ mer gsäid das säig nüt för sii ech sölli politisch aktiv wärde. Nochhär beni nomou zrog uf Eschebach met dene wo det alles wägghaue händ go rede. Dä dete hed gsäid si möiched das us Naturschotzgrönd. So total verchehrt. Ech ha nor gsäid das si Böim schände tüeged. Wie das drigseh hed. Är hed gfrogt öb ech scho jemals öpis vo invasive Neophyte ghört häigi. Ech ha natürlech no nie vo dem ghört gha. De händs glachet ond gsäid das mües mer aber scho wösse. Si tüeged die wägschniede damet di andere Arte weder wachse chöined. Wenn mer do nüt möichi wachsed i zäh Johr nome zäh verschedeni Arte. Si möiched das damet zwänzg verschedeni Baumarte wachse tüeged. Ech ha gsäid deför wäred die zäh verschedene Arte denn grösser mer sett die äifach lo wachse loh. Wie schnöu das ame weder wachse tüegi hedr no gmäint. Das föfzg Meter om d Bahngläis ome kei Böim wachse dörfed. Sie met de Sagi chöined gar ned so vöu usrechte es gsächti denn übel dri wenns met de grosse Maschene as Wärch giengted. Jede wo met de Sagi omelaufi möichi das ned ome söscht si tüeged de Gsöuschaft en grosse Dienscht erwiese. Forschtwart säigi äine vo de gregletschte Brüef es gäbi ke andere Bruef met so vöu Vorschrefte wie dä vom Forschtwart. Das säigi en Plackerei si fended fascht niemert me wo das mache wöui, das säig herti Arbet mer chöini debi emmer vomene Baum troffe wärde. Är verdieni ned omesöscht sächzg Franke i de Schtond. Hani grad chorz echli gschtuunet. Frogt är mech was ech denn schaffi secher arbeitslos. Är wölli mech gar ned schlächt rede. D Waldflächi nämi zue sed nünzähondertzäh. Säubscht wenn är Tag ond Nacht met de Motorsagi dor de Waud wörd laufe ond alles omtäti wär emmerno nüt wäg so vöu Waud häiged si. Es säig ned eso äifach ökonomisch Forschtwertschaft z betriebe si chöimed nor vierzg Franke pro Kubikmeter Houz öber. Denn hedr no vo de Esche verzöut dass d Esche vomene Asiatische Chäfer wos igschleppt häiged befalle säiged. Jo dä Chäfer händs ganz secher vo Asie igschleppt äidütig. Öber nünzg Prozänt vo allne Esche säiged tod die müesi mer alli fälle. Ech han vom Baudeggersee afo verzöue das es dete es Naturschotzgebiet esch ond äifach alli böim wägghaue werded. Jo das möichi mer damet niemert vomene omschtörzende Baum troffe wärdi hed äine vone gsäid. Är hätti au lieber mer wördi si lo schtoh loh au wenn de äine vomene Baum troffe wörd. Dass dete sowieso ned äifach nor Esche omtoh worde send mues äim auno klar si. Was ech denn för Naturschotz usgäbi. Ech gebe nüt för de Naturschotz us. Ech han em no gsäid das es a öisere Ernährig lied das d Natur so drigsehd. Do chöini är au nüt mache. Säubscht wenn ech Millione vo Franke hätti ond das alles för de Naturschotz usgäbti wördi det alles wägghaue. Wenn ech öpis gäge all dä Errsenn wott erreiche mues politisch öpis gänderet wärde ond Baumschändig als es Delikt igschtuft wärde so das d Polizei chämti ond öpis degäge mache wörd. Am Obig hed no mini Mueter aglütet. Hämmer dröber afo diskutiere jo ech häig haut scho e komeschi Mäinig. Ech han ere gsäid dasi emmerno de Mäinig ben das alli Veganer si müessted ond das wenn alli en Schäiss ufd Ernärig gebed s schwär sigi sech so z ernähre. Assimilierig hani gsäid. Am Schloss vom Gschpröch hed si abschätzig tschau gsäid ond denn no dezue völlig verblödet do chöimed mer ned uf en grüene Zwäig. Si hed mer äinisch gsäid das mer d Äscht vo de Böim müesi abhaue denn wachsed meh Fröcht ond grösseri. Ech werde ame scho echli bös dröber. Si esch fausch gnau wie all die andere. Si esch jo äigentlech ganz en armi aber ech ha scho extrem Schtriet gha met minere Mueter. Ech han ere äinisch d Möuch wägglährt. Am Schloss hed mi d Polizei zom Amtsarzt brocht ond ech be i de Psychiatrie glandet. So esch das. Die grausame Verbräche wonech gschpöhre mal dahingestellt. Alles was ech no ha chönne fotografiere esch d Landschaft, do hed äine chli Fürhouz gmacht.